Plantun de Prouvènço

Pèr coumpara dos planto d'encò nostre

Stipa iberica & Scleranthus annuus

Bauco-à-plumet(-ibèro)

Stipa iberica

Poaceae Graminaceae

Àutri noum : Péu-de-sant-Jan, Lanceto, Chavus d'ange.

Nom en français : Stipe ibère.

Descripcioun :
Aquesto bauco-à-plumet trachis dins li garrigo e tepiero roucaiouso sus cauquié entre 0 e 400 m. Es uno planto eisado de recounèisse emé si grand plumet vo péu-de-sant-Jan. Pamens la classificacioun s'es un pau coumplicado e fau espicha de proche li péu de la lemma (qu'èi dessus ço que lis ancian apelavon la lanceto, vèire çai-contro) que dèu agué la ligno dóu mitan (d'esquino) courteto ; En mai d'acò dèu i'agué de long péu sus li crèsto di jóuini fueio. Coumpara emé lis àutri bauco-à-plumet.

Usanço :
Bessai que lis enfant mandavon li grano pourtado pèr lou plumet coume de pichòti lanço ? Escriéure au site se n'en sabès mai.

Port : Grando erbo
Taio : 25 à 80 cm
Fueio : costo paralèlo
Tipe bioulougico : Emicriptoufite
Cicle bioulougico : Planto renadivo

Gènre : Stipa
Famiho : Poaceae
Famiho classico : Graminaceae

Ordre : Poales

Coulour de la flour : Blanco
Petalo : ges
Ø (o loungour) enflourejado : 25 à 30 cm
Flourido : Printèms - Estiéu

Sòu : Ca
Autour basso e auto : 0 à 400 m
Aparado : Noun
Mai à juliet

Liò : Garrigo - Relarg à jóuinis aubret - Tepiero roucaiouso
Estànci : Mesoumediterran à Subremediterran
Couroulougi : Eurimediterrano-Ouèst
Ref. sc. : Stipa iberica Martinovský, 1966

Gnavello(-de-l'an)

Scleranthus annuus

Caryophyllaceae

Nom en français : Gnavelle annuelle.

Descripcioun :
Aquelo planto, proun ramificado, se tirasso sus la sablo e lis endré trepeja. Sus si tijo se podon vèire uno à dos bando de péu crespu. Li fueio soun redo e en long. Li flour, verdo, soun pas bèn grosso e fan d'enflourejado agroumelado. La subsp. presentado eici, emé de flour gaire duberto e que trachis dins li mitan primàri, ié dison polycarpos. Coumpara emé la gnavello-renadivo.

Usanço :
Fai partido dóu group (38 meno) de flour dicho "de Bach". Ramenten que lou mege, Dr Edward Bach (1886-1936), adoubè de poutingo de flour que dèvon "armounisa l'equilibre epsichique de la persouno". La gnavello permetrié de prendre de decisioun. En Poulougno, au siècle passa s'acampavo li babo de vermèu (Coccus Polonicus) que reston sus li racino pèr n'en faire un coulourant rouge.